الشروط والأحكام

باستخدامك لمنيوكيت — سواء فتحت حساب أو استخدمت المنيو — بتكون موافق على الشروط دي. لو مش موافق على أي بند، من فضلك ما تستخدمش الخدمة.

منيوكيت منصة بتبني بيها منيو رقمي لمطعمك أو كافيهك، وتشاركه مع عملائك برابط أو QR Code. تقدر تعدّل المنتجات والأسعار في أي وقت، وتدير فروع ليها أسعارها وتوافرها، وتستقبل طلبات من المنيو لو فعّلت الخاصية.

بنطوّر المنصة باستمرار وبنضيف مميزات جديدة. المميزات دي بتوصلك في اشتراكك الحالي من غير أي رسوم إضافية.

• الهوية: حسابك مرتبط برقم هاتفك، والدخول بكود تحقق بيتبعت عليه. إنت مسؤول عن الرقم ده وعن أي استخدام بيتم منه.
• الصلاحيات: تقدر تدي موظفينك صلاحيات محددة. أي عملية بيعملوها بتتحسب على متجرك.
• دقة البيانات: إنت المسؤول عن صحة الأسعار والمكونات وأي بيانات بتعرضها لعملائك.

• مجاني للبناء: تقدر تسجّل وتبني المنيو بتاعك وتضيف منتجاتك من غير أي رسوم. الاشتراك مطلوب بس عشان المنيو يظهر لعملائك.
• الخطط: شهري بدون خصم، ربع سنوي بخصم 15%، وسنوي بخصم 40%. كل الخطط فيها نفس المميزات.
• الفروع: الخطة بتشمل فرع واحد، وكل فرع إضافي بتكلفة إضافية بتتحسب على مدة اشتراكك.
• طريقة الدفع: التحويل يدوي عبر إنستاباي أو فوري أو فودافون كاش، وبتبعت لنا الإيصال. بنفعّل الاشتراك عادةً خلال أقل من يوم.

لما الاشتراك يخلص، عندك مهلة 5 أيام تجدد فيها. بعد المهلة دي المنيو بيتوقف عن الظهور لعملائك وبيشوفوا صفحة بتقول إن المنيو موقوف مؤقتاً.

بياناتك ما بتتحذفش أبداً في الحالة دي. تجدد في أي وقت والمنيو يرجع زي ما كان بكل منتجاته وتصنيفاته.

لو جددت وإنت لسه في المهلة، الاشتراك الجديد بيبدأ من تاريخ انتهاء القديم — فمش بتدفع عن أيام استخدمتها مرتين.

الاشتراكات المدفوعة مش قابلة للاسترداد. عملية الدفع بتمر بأكتر من خطوة تأكيد قبل ما تحوّل، فالتحويل معناه إنك شُفت الخطة والمبلغ ووافقت عليهم.

لو حصل خطأ حقيقي — حوّلت مبلغ غلط أو اتفعّل اشتراك مش اللي طلبته — كلمنا وهنسمعك ونشوف أنسب حل. القرار بيرجع لنا حالة بحالة، ومش بنلتزم بالاسترداد.

لو فعّلت استقبال الطلبات، منيوكيت بتوصّل الطلب من العميل لمتجرك وبس. التعامل التجاري بينك وبين العميل: إنت اللي بتأكد الطلب وتجهزه وتتفق على الدفع والتوصيل.

منيوكيت مش طرف في عملية البيع ومش مسؤولة عن جودة المنتجات أو تنفيذ الطلب أو أي خلاف بينك وبين العميل.

• ممنوع نشر محتوى مخالف للقانون أو مضلل أو ينتهك حقوق غيرك.
• ممنوع استخدام المنصة لبيع منتجات محظورة قانوناً.
• ممنوع محاولة اختراق المنصة أو الوصول لبيانات متاجر تانية.
• ممنوع إعادة بيع الخدمة أو تأجيرها لطرف تالت من غير اتفاق معانا.

لو حصل خرق واضح للبنود دي، من حقنا نوقف الحساب مع إخطارك بالسبب.

رابط متجرك هو عنوان المنيو، والـ QR Code بيشاور عليه. لو غيّرت الرابط، أي QR Code مطبوع قبل كده هيبقى مش شغال — والأكواد المطبوعة مش ممكن نسترجعها.

خلي بالك من ده قبل ما تغيّر الرابط بعد ما توزع أكواد مطبوعة على طاولاتك.

محتوى متجرك — أسماء منتجاتك وأسعارها وصورك وشعارك — ملكك إنت، وبتدينا إذن نعرضه في المنيو او نستخدمه لأغراض تحليل بيانات لتحسين الخدمة وهكذا.

المنصة نفسها وتصميمها وكودها ملك منيوكيت وشركة Webket.

بنشتغل على إن الخدمة تبقى شغالة طول الوقت، لكن مش بنقدر نضمن استمرارية 100% — ممكن يحصل توقف لصيانة أو لظروف خارجة عن إرادتنا.

مسؤوليتنا في أي حالة محدودة بقيمة اللي دفعته في اشتراكك الحالي.

ممكن نحدّث الشروط دي مع تطور الخدمة. تاريخ آخر تحديث مكتوب فوق، واستمرارك في استخدام المنصة بعد التحديث معناه موافقتك على النسخة الجديدة.

الشروط دي بتخضع لقوانين جمهورية مصر العربية. لو عندك أي استفسار، إحنا موجودين.