سياسة الخصوصية

في منيوكيت فيه نوعين من الناس، وبياناتهم مختلفة تماماً: صاحب المتجر اللي بيفتح حساب ويدير المنيو والعميل اللي بيفتح المنيو من موبايله.

صاحب المتجر بيسجل عندنا بحساب. العميل مش بيسجل ولا بيعمل حساب أبداً — يقدر يتصفح المنيو كله من غير ما نعرف هو مين.

• من صاحب المتجر: رقم الهاتف (وده هويتك عندنا)، الاسم، النوع، والصورة الشخصية لو رفعتها.
• عن المتجر: اسم المتجر ورابطه، الشعار وصورة الغلاف، الوصف، روابط التواصل، الفروع وعناوينها، والمنتجات بأسعارها وصورها.
• من عميل المنيو: مفيش أي حاجة بتعرّفه أثناء التصفح — غير بيانات زيارة مجهولة للقياس، مشروحة تحت في بند القياس والتحليلات. لما يعمل طلب بس بنطلب رقم هاتفه، ورقم الطاولة أو عنوان التوصيل حسب نوع الطلب. ورقمه وعنوانه بيتحفظوا كمان على موبايله هو عشان ميكتبهم تاني، وده مشروح في بند الكوكيز والتخزين.
• سجلات النظام: بنسجل العمليات اللي بتتم من لوحة التحكم (مين عدّل إيه وإمتى) عشان الأمان ودعمك لما تحتاج.

الاشتراكات بتتدفع يدوياً عن طريق إنستاباي أو فوري أو فودافون كاش، وبتبعت لنا إيصال التحويل. معناها إن بيانات كارت الدفع بتاعك مش بتمر علينا ولا بتتخزن عندنا أصلاً.

اللي بنحتفظ بيه هو تفاصيل الاشتراك نفسه: الخطة، المبلغ، وتواريخ البداية والانتهاء.

• تشغيل الخدمة: عرض المنيو بتاعك لعملائك، وإدارة متجرك وفروعك ومنتجاتك.
• تسجيل الدخول: بنبعت كود تحقق على رقم هاتفك بدل كلمة السر.
• الطلبات: توصيل بيانات الطلب للمتجر عشان يجهزه ويتواصل مع العميل.
• الدعم والأمان: الرد على استفساراتك، وكشف أي استخدام غير سليم.

مش بنبيع بياناتك ولا بيانات عملائك لأي حد، ومش بنستخدمها في إعلانات.

• المتجر: بيشوف طلباته وبيانات التواصل اللي العميل كتبها عشان يقدر ينفذ الطلب.
• مزودي الخدمة: استضافة السيرفرات، تخزين الصور، وخدمة إرسال كود التحقق على واتساب أو SMS.
• الجهات الرسمية: لو فيه التزام قانوني يفرض علينا كده.

عميل المنيو بيتعامل مع المتجر مباشرة. إحنا بنوصّل الطلب، مش طرف في البيع نفسه.

بنستخدم Google Analytics و Microsoft Clarity عشان نعرف الصفحات اللي بتتفتح أكتر وإزاي الناس بتستخدم المنيو والموقع. ده بيساعدنا نحسّن التصميم ونعرف إيه اللي مش شغال كويس.

الأدوات دي بتشوف صفحة مفتوحة وجهاز ومتصفح ومكان تقريبي من الـ IP، وClarity بيسجل كمان حركة الإصبع أو الماوس والضغطات والتمرير على الصفحة. إحنا مش بنبعتلهم اسمك ولا رقم هاتفك ولا عنوانك ولا تفاصيل طلبك — البيانات دي بتفضل عندنا.

• في المنيو: بنبعت رابط المتجر والفرع عشان نعرف أي منيو بيتفتح، من غير أي حاجة تخص العميل نفسه.
• في الموقع: بنبعت نوع الصفحة (الرئيسية، الخصوصية، الشروط) بس.
• في لوحة التحكم: Clarity بيشتغل عشان نحسّن استخدام اللوحة. بياناتك وبيانات متجرك نفسها مش بتتبعت له.

الأدوات دي شركات تانية ليها سياسات خصوصية خاصة بيها، وبتتحكم في البيانات اللي بتجمعها حسب شروطها.

بنخزن حاجات في متصفحك عشان المنصة تشتغل صح، مش عشان نتتبعك عبر مواقع تانية. إحنا مش بنبيع بيانات ومفيش إعلانات على المنصة.

• أساسية: كود دخولك للوحة التحكم، اللغة اللي اخترتها، شكل المنيو (فاتح أو غامق)، والسلة بتاعة العميل. من غيرها المنصة مش هتشتغل.
• على موبايل عميل المنيو: آخر رقم هاتف وآخر عنوان توصيل كتبهم في طلب بعته فعلاً، عشان نعبّي له الطلب اللي بعده بسرعة، وأرقام مرجعية عشوائية لطلباته الحالية عشان يقدر يتابعها. الحاجات دي محفوظة على جهازه هو بس، ومش بتتبعت لحد غير جوه الطلب اللي هو بيبعته بنفسه.
• تحليلية: كوكيز من Google Analytics و Clarity بتميّز الزيارة عن غيرها عشان العدّ يبقى صح.

تقدر تمسح الكوكيز أو تمنعها من إعدادات متصفحك في أي وقت، وجوجل كمان بتوفر إضافة للمتصفح توقف Google Analytics تماماً. وعميل المنيو يقدر يمسح رقمه وعنوانه وأرقام طلباته من إعدادات المنيو نفسها في أي وقت. لو منعت الكوكيز الأساسية، الدخول والسلة مش هيشتغلوا.

كل الاتصال بالمنصة بيمر على HTTPS. الدخول بيتم بكود تحقق مؤقت بينتهي بعد دقايق، والصلاحيات بتتحدد لكل موظف على حدة فمش أي حد بيشوف كل حاجة.

سلة المشتريات بتتخزن في متصفح العميل نفسه، وبتحتوي على أرقام المنتجات والكميات بس — من غير أسعار. السعر بيتحسب على السيرفر وقت الطلب، فمفيش سعر متخزن في الموبايل ممكن يكون قديم أو متعدّل.

متابعة الطلب بتشتغل برقم مرجعي عشوائي طويل بيتولد لكل طلب لوحده، مش برقم الطلب اللي العميل بيشوفه، فمحدش يقدر يخمّن طلبات غيره. وصفحة المتابعة بتورّي حالة الطلب ومحتواه ورقم الطاولة بس — مفيش رقم هاتف ولا عنوان ولا أي حاجة تعرّف مين اللي طلب.

بنحتفظ ببيانات متجرك طول ما حسابك موجود. لو الاشتراك انتهى، المنيو بيتوقف عن الظهور للعملاء لكن بياناتك بتفضل زي ما هي، فتقدر ترجّع اشتراكك وتلاقي كل حاجة مكانها.

الطلبات بتفضل محفوظة عند المتجر كسجل للمبيعات. لو طلبت حذف حسابك بنحذف بياناتك الشخصية وبيانات متجرك.

• الاطلاع: تعرف إيه البيانات اللي عندنا عنك.
• التصحيح: تعدّل أي بيانات غير صحيحة من لوحة التحكم مباشرة.
• الحذف: تطلب حذف حسابك وبياناتك.
• الاعتراض: توقف أي استخدام للبيانات مش موافق عليه.

لما نضيف مميزات جديدة ممكن نحدّث الصفحة دي. تاريخ آخر تحديث مكتوب فوق، ولو حصل تغيير جوهري في طريقة تعاملنا مع بياناتك هنبلغك.

لو عندك أي سؤال عن خصوصيتك أو عايز تمارس أي حق من حقوقك، كلمنا.